Su Gazetinu, martis 12 de martzu de su 2024
Is siendas agrìculas ghiadas dae fèminas – Giòvanas, cualificadas e chi punnant a s’annoadura: in Sardigna sunt 7.800 is impresas agrìculas ghiadas dae fèminas, mentras in su panorama natzionale sunt agiomai 200 mìgia is fèminas imprendidoras chi ant seberadu de punnare a su setore agrìculu contras de ònnia pregiudìtziu. Est su chi nde essit a pìgiu dae s’analizu de Fèminas Coldiretti impreende is datos de su Registru de is Impresas e bogadu in ocasione de s’8 de martzu.
“Is fèminas in agricultura, cun su tempus, sunt istadas semper de prus e ant favorèssidu fintzas s’annoadura e s’intrada de is giòvanos, cunsideradu chi is datos natzionales faeddant de su 25 % de is fèminas in agricultura chi sunt laureadas e de su 60 % chi faghet laurera biològica”, regordat Maria Gina Ledda, coordinadora regionale de Fèminas Coldiretti Sardigna. “In Sardigna is fèminas tenent unu rolu de importu in siendas chi sunt semper de prus multifuntzionales (a livellu natzionale sunt su 50%) e chi ponent cambas a progetos diferentes, dae s’educatzione alimentare e ambientale a su raportu cun is iscolas, passende peri is siendas agrìculas didàticas”.
In Itàlia prus de una sienda agrìcula ònnia bator – su 28% – oe est ghiada dae una fèmina, cun una presèntzia chi amegat de mudare a manera funguda su traballu in su sartu, dae sa pesamenta de bestiàmene a is coltivos, dae su florovivaismu a s’agriturismu, dae su manìgiu de is produsimentos a sa bèndida dereta. Sa fortza chi tenent est però fintzas in is fainas sotziales chi contivìgiant.
Nde essit a campu, in prus, chi sa “parte giòvana” est formada dae unas 13 mìgia siendas de fèminas ghiadas dae pitzocas chi tenent prus pagu de 35 annos chi ant punnadu prus che totu a impreare sa tecnologia in su traballu issoro. Ma is imprendidoras agrìculas sunt giòvanas e cun una professionalidade arta, de tale manera chi una ònnia bator (su 25%) est laureada, bortas meda non cun un’indiritzu agràriu, ma a pustis de caminos de istùdiu o esperièntzias in setores diferentes, fintzas pro fàghere una vida noa.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
@Riproduzione riservata
commenta