Su Gazetinu, chenàbura 29 de martzu de su 2024
Sa relata in contu de su clima – Su 25 de martzu su giornale Il Sole 24 Ore at publicadu s’editzione noa de sa relata in contu de su clima. Sa classìfica est agiornada cun is datos frunidos dae 3bmeteo chi pertocant is deghe annos 2013-2023 e dda cuncordant pighende in cunsideru 10 paràmetros chi mesurant is cunditziones de tempus bellu prus fitianas e contant in cales de is 107 tzitades cabu-logu si bivet mègius pro su chi pertocat su clima.
In Sardigna, in su primu postu ddoe est Casteddu (sa de deghe in Itàlia cun 691,9 puntos e cun una temperadura crèschida de + 1,55 grados), sighida dae Tàtari (sa de 29, cun 633,4 puntos e una crèschida de sa temperadura de + 0,79 grados) e dae Aristanis (in su de 36 postos, cun unu puntègiu de 623,9 e una crèschida de sa temperadura de + 1,38 grados). Serrat su Sud de Sardigna in sa positzione 68, cun 558,3 puntos e una crèschida de sa temperadura de + 1,76 grados.
Prus a fine, Aristanis est intra de is provìntzias mègius in duos inditadores cunsiderados, est a nàrrere is proiduras mannas e perigulosas e is dies fridas. In sa classìfica de is dies fridas, imbetzes, paris cun Aristanis ddoe est fintzas Casteddu, ambas duas in sa punta de sa classìfica cun nemmancu una die de frius.
Is àteros ìndighes nd’ant fatu essire a pìgiu: 8,2 oras de sole in sa die (mèdia de sa simana 2008-2018); 91,9 dies in s’annu cun temperadura intèndida prus manna o uguale a 30 grados (mèdia de sa simana 2011-2021); 18 undadas de basca meda; 8,1 nodos mesanos de bentu a sa die in s’istajone (mèdia de sa simana 2011-2021); 220,6 dies a s’annu de umidesa relativa; 596 dies in totu cun ufuladas de bentu a prus de 25 nodos in sa simana 2011-2021; 74,5 dies a s’annu in ue proet cun regortas de abba prua artas de 2 millìmetros in a su mancus una fasca orària in sa simana 2011-2021; 6,8 dies a s’annu cun nèbida in a su mancus una fasca orària de ses oras (mèdia in sa simana 2011-2021).
In su primu postu, in sa classìfica natzionale, ddoe est Bari cun oto oras e mesu de sole ònnia die, noe dies de proiduras foras de mesura a s’annu, 74 dies de abba proina in 365 e isceti 158 dies a s’annu foras de su istare bene climàticu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta