Su Gazetinu, martis 28 de maju de su 2024
Sa Baronia amegat de connòschere una sicànnia mala – Creschet su pistighìngiu in Baronia pro more de s’emergèntzia ìdrica: in cussas biddas chi ddis benit a mala bògia a impreare s’abba a istìddiu a istìddiu, sena de dd’isperditziare, sunt timende cunsighèntzias graes siat pro su chi pertocat s’economia agrìcula e pastorale, ma fintzas pro su chi pertocat su turismu, cun s’istajone chi paret chi promitat bene.
Est pro cussu chi sa presidente de sa Regione Alessandra Todde at cunvocadu cun urgèntzia, eris, un’addòbiu in arborada de Trentu, in Casteddu, pro faeddare de custa chistione.
Ddoe ant pigadu parte is sìndigos de Budune, Santu Diadoru, Thiniscole, Pasada e Torpè, is ghias de Abbanoa, Egas e de su Cunsòrtziu de Bonìfica de sa Sardigna tzentrale. Ma ddoe fiant fintzas is assessores de s’Ambiente, Rosanna Laconi, de is Entes locales, Francesco Spanedda, e de sa Programmatzione, Giuseppe Meloni.
In collegamentu vìdeo fiant presentes fintzas s’assessore de s’Agricultura, Gian Franco Satta, e cussu de is Traballos pùblicos, Antonio Piu. In rapresentàntzia de s’assessore de su Turismu, Franco Cuccureddu, ddoe fiat su capu de su gabinetu suo. In prus, est intervènnidu su prefetu de Nùgoro, Giancarlo Dionisi.
S’est faeddadu de sa delìbera chi òbligat su Cunsòrtziu de Bonìfica a mandare s’abba dae is regortas suas a is potabilizadores de Abbanoa, lassende sena de abba cussòrgias intreas e logos turìsticos de importu.
In s’addòbiu, chi at tentu dura de tres oras, ant pigadu unu determinu de importu. “Amus a tènnere una mesa permanente, pro ite ca is chistiones sunt medas e is interlocutores chi si depent mòvere sunt unos cantos. Pro su chi pertocat sa delìbera – at atzuntu sa presidente – est craru chi sa situatzione est grave e nois arriscamus, in s’acabbu de trìulas, de no àere prus nen s’abba de su Cunsòrtziu, nen cussa bella a bufare, si non si faghent interventos urgentes. Pro cussu est pretzisu a acontzare is pèrdidas chi tenimus, cun unu programma de assentu lestru fatu dae Abbanoa. Tocat a sighire unu cronoprogramma siat pro is interventos urgentes, siat pro cussos a simana mesana e longa”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta