Su Gazetinu, martis 4 de làmpadas de su 2024
Sa poberesa in Sardigna – Una parte de tres de is sardos est in arriscu de poberesa o de esclusione sotziale. Est su chi nde essit a pìgiu dae su cuadru tràgicu pintadu dae sa relata de s’Assòtziu Natzionale de is Antzianos e de is Pensionados de Confartesania Sardigna, chi movet dae sa rilevadura fata dae s’ISTAT pro is duos annos 2022-2023.
Castiende is pertzentuales, su 32,9% de sa populatzione de sa Sardigna in su 2023 est istada in arriscu, cun un’ismèngua cunforma a sa mèdia de su 2022 de su 36,4%, ma a subra meda de sa mèdia natzionale de su 22,8% pro s’annu apenas passadu.
Un’àteru allarme pertocat s’analizu de su nùmeru de is sardos in cunditziones de mancamentu grave materiale e sotziale: in su 2023 est lòmpidu a su 6,9%, cun una crèschida de su 0,2% cunforma a s’annu in antis e cun unu datu a subra de sa mèdia natzionale, firma a su 4,7%.
“Sunt nùmeros chi faghent atzutzuddire, pro ite ca iscòviant chi una parte de tres de sa populatzione sarda tenet ònnia die sa dificultade de mandigare bene, de si curare, de bìvere in una domo bellighedda, de istudiare, e custu pro ite ca connoschet sa poberesa”, narat Giovanni Mellino, presidente regionale de ANAP Confartesania Sardigna, e vitze-presidente natzionale. “Totu custu est su resurtadu de sa situatzione econòmica e sotziale de sa Sardigna in su 2023, chi no est istada bella meda, e nde faghet essire a campu su bisòngiu de interventos pretzisos pro megiorare is cunditziones de vida de is famìllias e pro ismenguare s’arriscu de poberesa e de esclusione sotziale in sa regione”.
S’istùdiu in prus at pigadu in cunsideru is pensiones in s’Ìsula nostra: su totale est de 8,4 milliardos, e – de custos – 5,4 milliardos pro betzesa. Is pensionados pro betzesa in Sardigna sunt 267 mìgia, chi – comente amus naradu – tirant de pensione 5 milliardos e 400 milliones in totu.
“A palas de custos nùmeros fridos ddoe sunt antzianos cun rèdditos bassos meda, disocupados e traballadores pòberos, famìllias a unu rèdditu isceti e ex ocupados, ma fintzas totu cuddos chi ant pèrdidu s’ispera de agatare un’ocupatzione chescedosos”, acabbat Mellino.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta