Su Gazetinu, giòbia 4 de trìulas de su 2024
Sa coa de chida in Sardigna – Custos sunt is addòbios prus de importu in custa coa de chida in Sardigna. In provìntzia de Aristanis, chenàbura in Crabas acabbat su Fèstival de s’Archeologia cuncordadu dae sa Fundatzione Mont’’e Prama cun is ùrtimas cunferèntzias acasagiadas in su Museu tzìvicu “Giovanni Marongiu”. In Aristanis, imbetzes, in sa pratza de is Boes, ant a inaugurare sa mustra de Dromos intitulada “F**KING CHANGE aici giustu, aici faddidu”.
Sàbadu, sa marina de Turre Manna acasàgiat sa de bator tapas de sa de tres editziones de su “Sardigna Beach Rugby Cup”. In Sèdilo, imbetzes, sàbadu e domìnigu sunt is dies de S’àrdia 2024: sa currera a caddu chi is sedilesos faghent pro Santu Antinu e sa filera de addòbios e fainas chi faghent parte de su programma de sa festa. Semper sàbadu, ma in Crabas, cumentzat su Fèstival literàriu de s’Archeologia in Tharros, contivigiadu dae sa Fundatzione Mont’’e Prama.
In provìntzia de Nùgoro sighit su Fèstival “S’ìsula de is contos” de Gavoi, chi cumentzat oe giòbia 4 de trìulas e in programma fintzas a domìnigu 7 de trìulas. Intra de is protagonistas ddoe at a èssere fintzas Gino Cecchettin, chi s’incràs at a tramudare a Portu Turre pro presentare su libru suo in Éntula fèstival.
In Tàtari, imbetzes, chenàbura torrat a cumentzare s’istajone de istadiale de is “Noturnos de dies de oe”, sa rassigna de cuntzertos chi ponet paris is grandos clàssicos cun mùsicas cumpostas dae is dischentes de Cumponidura. Sa filera de cuntzertos dda cuncordant is Cunservatòrios de Tàtari e de Casteddu, s’Iscola tzìvica de mùsica “Antonietta Chironi” de Nùgoro e s’assòtziu “Arte in mùsica” de S’Alighera.
Semper chenàbura a merie, ma in is Velas de su Portu Betzu de Istintinu, ddoe at a èssere sa de ùndighi editziones de “Stintino Jazz&Classica”, cun su cuntzertu de su Blue Note Brass Sextet plus Drums, mentras fintzas a su 6 de trìulas S’Alighera at a acasagiare is Concours Mondial de Bruxelles e s’Alguer Wine Week. Sa tzitade catalana si fùrriat a èssere aici sa bidriera mundiale de su binu, cun custos addòbios de livellu internatzionale.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta