Su Gazetinu, giòbia 11 de trìulas de su 2024
Biàgiu peri s’Ìsula intra de is addòbios de custa coa de chida – Mùsica, cultura, sagras e isport. Una filera longa de addòbios ant a piessignare custa coa de chida in Sardigna. In Gaddura, protagonistas ant a èssere su risu, su teatru de bia e sa mùsica: fintzas a sàbadu in Santa Teresa ddoe est su “Gallura Buskers Festival”. In provìntzia de Casteddu, imbetzes, ddoe at a èssere unu de is addòbios culturales prus de importu de totu s’istadiale: in su Parcu Archeològicu de Nora, dae chenàbura e fintzas a su 27 de trìulas, in iscena ddoe at a èssere sa de 42 editziones de “Sa Note de is Poetas”, su fèstival in contu de su patrimòniu archeològicu pretziadu de s’Ìsula.
In sa costera nord-otzidentale de s’Ìsula, su Nuraghe Palmavera de S’Alighera at a acasagiare fintzas a su 16 de trìulas sa de 4 editziones de su fèstival literàriu “Mediterrànea. Culturas. Cuncàmbias. Passadas” in contu de sa dimensione, literària e culturale de su Mediterràneu. In cue etotu ddoe est fintzas su “Tzìnema de is Terras de su Mare”, cuncordadu dae sa Sotziedade Umanitària de S’Alighera, in contu de is prajas ammajadoras de sa Costera de su Coraddu, fintzas a su 25 de trìulas, cun projetziones e àteros addòbios. E, ancoras, sàbadu a merie, sa Die de s’Akenta 2024 de sa Cantina Santa Maria La Palma.
In provìntzia de Tàtari, in Ossi sàbadu s’apuntamentu est cun sa sagra de su Tzitzigorru, cun tastaduras a tema pro totus e ispetàculos de istentu.
In provìntzia de Aristanis, imbetzes, is avesos de su connotu antigu ant a èssere protagonistas in Busache cun sa manifestatzione “Busache e is colores suos” e sa de XXIII Rassignas regionales de su Folklore e su de XVI Carrasegare de istadiale de is màscheras de su connotu, cuncordados dae s’assòtziu Pro Loco “Cunventu” de Busache cun s’agiudu de su Comune, de sa Fundatzione Sardigna e de sa Regione Sardigna.
In Aristanis imbetzes s’apuntamentu est cun s’isport e cun su bonucoro gràtzias a su “Rotary curret Aristanis” in programma pro sàbadu a merie, mentras in Crabas, in s’anfiteatru de Tharros in Santu Giuanne de Sinis, protagonista at a èssere sa dantza cun Roberto Bolle and Friends, chenàbura a merie, e cun su Dancing Histor(y)ies Fèstival Crabas, chenàbura e sàbadu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta