Su Gazetinu, mèrcuris 17 de trìulas de su 2024
Sa praja de La Pelosa est giai unu sutzessu de istadiale – Sa praja de La Pelosa, in su territòriu de Istintinu, sighit a èssere una de is prajas chi agradat de prus a is turistas e una de is destinatziones balneares prus disigiadas de Itàlia.
Comente at fatu a ischire su Comune de Istintinu, chi giai dae unos cantos annos at postu su nùmeru de intradas lacanadu pro amparare s’ambiente delicadu de cussa praja, ònnia die su sistema de prenotatzione gestit intra de is 8.000 e 9.000 cuntatos pro sa còmpora de is billetes.
Nùmeros de importu a beru, si si pensat chi ònnia die sa praja tenet una disponibilidade de 1.500 postos isceti partzidos in duas categorias: 750 billetes si podent comporare cun antètzipu mannu pro totu s’istajone, mentras is àteros 750 si podent comporare a intro de is ùrtimas 48 oras in antis de sa die de sa bìsita.
“Custos datos mustrant cantu La Pelosa pragat a sa gente”, decrarat Rita Vallebella, sìndiga de Istintinu. “Semus faeddende de 40.000 persones potentziales ònnia die – 1 utente, difatis, podet comporare fintzas a 4 billetes – chi cherent bisitare sa praja nostra. Est unu nùmeru artu chi nos faghet praghere a beru, ma chi in su pròpiu tempus nos ponet in palas una responsabilidade manna”.
“Cumprendimus bene sa delusione de chie non resesset a intrare a sa praja”, sighit sa sìndiga. “Comente si siat su nùmeru lacanadu est unu provedimentu chi serbit pro amparare custu paradisu naturale. Est su prètziu chi depimus pagare a cumone pro assegurare chi is generatziones imbenientes potzant sighire a gosare de sa bellesa ìnnida de La Pelosa”.
Su Comune non torrat in dae a segus cunforma a su determinu chi at pigadu. “Su de pònnere làcanas a is intradas at giai mustradu in is annos passados cantu siat profetosu. Difatis, amus bidu cantu sa calidade de s’ecosistema marinu de sa costera apat megioradu, aici etotu comente at ismenguadu s’ispimpirinadura de sa praja”, acabbat Vallebella.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta