Su Gazetinu, lunis 22 de trìulas de su 2024
Su Casteddu si ponet sos colores de s’Ìsula – Donu pro su Monte Arci e pro Pau in sa de tres màllias de su fùbalu Casteddu. Ant a èssere sos colores e sas rigaduras de sa pedra crobina paris cun su linu fine, su filadu pretziadu chi s’otenet dae sa Pinna nobilis, a dare s’idea pro una de sas divisas de s’istajone isportiva noa. Sa presentatzione de sa de tres màllias 2024-2025, chi si narat “Mari e Perda”, ispiegat in custa manera sos detàllios de sos duos elementos chi lu distinghent.
“Gràtzias a s’archeòloga Maria Cristina Ciccone, responsàbile de sos servìtzios educativos de su Museu de sa Pedra crobina de Pau”, si leghet in sa nota de sa sotziedade ruja-biaita, “amus connotu unu de sos ùnicos duos museos de su mundu dedicados a sa pedra crobina, chi faeddat pròpiu de s’istòria de custa pedra chi s’est formada milliones de annos a como e fiat impreada dae sas comunidades de su territòriu nessi otomìgia annos in antis de oe. Sa maia b’est ancora in su Parcu de sa Pedra crobina, in Monte Arci, su logu in ue custa istòria ispantosa est acontèssida annos e annos a como e in ue ancora s’agatant sos restos de su traballu fatu in època neolìtica”.
“Su mastru Chiara Vigo”, acabbat sa sotziedade ruja-biaita, “nos at retzidu in unu logu in ue amus agatadu cosas chi non si podent mancu bisare”, sighit su documentu. “Su Museu de su Linu fine de Sant’Antiogu mantenet unu nùmeru mannu de contos chi faeddant de connoschèntzias antigas tramudadas dae una generatzione a s’àtera chi tenent a protagonista su linu fine. Chiara Vigo, unu de sos ùrtimos testimòngios de unu tempus de custoire, narat issa etotu sos contos a chie andat a su museu, ispieghende comente su linu fine – su filamentu chi su conchìgiu a duas còtzulas prus mannu de su Mediterràneu, sa Pinna nòbilis o nacchera, bogat pro s’apitzigare a su fundu de su mare (in antis chi sa Pinna nobilis esseret ratza bardiada) si colliat in unu tempus definidu de s’annu, intrende a suta de s’abba in sa manera giusta pro non fàghere dannu a su conchìgiu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta