Su Gazetinu, chenàbura 26 de trìulas de su 2024
Su Cabu de Susu de Sardigna sufrit pro more de su fogu – Chentinas de ètaros de pasturas bellas e padentes birdes papados in pagas oras; prus de 300 berbeghes mortas e deghinas de mìgias de èuros de dannos a is fràigos de is siendas. Sa Coldiretti faeddat cun pistighìngiu de sa situatzione mala de su Nord de Sardigna e de sa Sardigna de Mesu pintende unu bilàntziu grae de is dannos a is siendas de pesamenta de bestiàmene, a pustis de su fogu chi at interessadu intra de domìnigu e lunis passados tretos mannos de su Tzentru e de su Nord de s’Ìsula.
“Su contu de is dannos est comintzadu in sa peus manera”, narat s’assòtziu. “Pigamus s’esempru de unu pastore de Oroteddi – sa bidda chi at tentu dannos prus mannos – sòtziu de sa Coldiretti de Nùgoro e Ogiastra chi, pro more de su fogu, nche at pèrdidu totu su tàgiu suo de 250 berbeghes, is fràigos de sa sienda sua e oe sighit a chircare is caddos, chi si nche sunt fuidos dae su fogu”. Agiudu e faeddos de incoragimentu arribant fintzas dae su presidente de sa Coldiretti de Nùgoro-Ogiastra, Leonardo Salis, e dae su diretore de sa Coldiretti de Nùgoro-Ogiastra, Alessandro Serra.
“Sa de su fogu”, narat, “est una liaga chi bolet firmada, onni annu connoschimus custos acontèssidos chi degòlliant su sartu nostru e faghent dannos malos a contare a is siendas chi faghent investimentos mannos pro pòdere campare”.
Sa basca meda e sa sicànnia favoressent s’isparghidura de su fogu: dae su cumentzu de su mese de trìulas in Itàlia sunt brusiados 7.000 ètaros, segundu s’analizu chi Coldiretti at fatu de is datos de s’Effis, s’European Forest Fire Information System.
Segundu sa relata de Coldiretti, s’Itàlia resurtat partzida in duas partes: in su Sud si gherrat contras de sa basca, su fogu e sa sicànnia, in su Nord e in su Tzentru imbetzes sunt connoschende temporadas malas. Dae primìtzios de su mese de trìulas si contant 347 acontessimentos malos chi ant interessadu s’Itàlia, pro su prus in su Nord, intra de undamentos, landireddadas e stravulliadas de bentu forte.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta