Su Gazetinu, giòbia 1 de austu de su 2024
Una prima coa de chida de austu rica de addòbios – Custa prima coa de chida de su mese de austu puru est rica meda de addòbios de ònnia genia in Sardigna. In provìntzia de Aristanis ddoe at unas cantas sagras chi ant a fàghere lòmpere mìgias e mìgias persones: in Mragaxori, sàbadu e domìnigu, ddoe est sa de XXVIII editziones de sa sagra de is Lorighitas. In Narabuia, imbetzes, semper sàbadu, ddoe est “Saboris antigus”, mentras in Siamanna ddoe cuncordant sa de 26 editziones de sa Sagra de is culurgionis. Frùmenes de birra, mandiares bonos e mùsica ant a piessignare sa bia oru-oru de mare de Turre Manna cun sa de tres editziones de su Sardinia Beer Fèstival, dae chenàbura a domìnigu. In fines, in Samugheo, in su Murats, cumentzat s’editzione 2024 de “Tessìngiu”, chi at a abarrare aberta fintzas a su mese de cabudanni. Ma non faghet a si-nde iscarèscere de Dromos e de is apuntamentos suos: in Donigala Fenughedu cun su pianista cubanu Roberto Fonseca (su 2 de austu); in su tèmpiu ipogèicu de “Sa scaba de crèsia”, acanta de Mragaxori, cun is Cordas et Cannas e sa cantante cubana Aymée Nuviola (su 4 de austu).
In provìntzia de Casteddu imbetzes ddoe est sa de XV editziones de s’International Nora Jazz Fèstival chi dae oe fintzas a s’11 de austu afestat is boghes feminiles prus bellas de su jazz mundiale in su logu archeològicu ammajadore de Nora. Ddoe est fintzas Sting chi torrat a Itàlia cun unu cuntzertu in su Forte Arena de Santa Margherita de Pula, in programma pro sàbadu. Note de mùsica fintzas in s’Arena fenìtzia de Sant’Antiogu sàbadu cun Roy Paci & Aret auska e su “Rumba Tour 2024” issoro.
In Carloforte ddoe sunt is fainas de is ùrtimas dies de sa rassigna “S’Ìsula de is libros”: oe in cumpangia de Luca Bianchini in su Giardinu de nodas e cras cun Massimo Carlotto semper in su giardinu de nodas e, a pustis, cun su recital de Francesco Dominici Buraccini.
In provìntzia de Nùgoro, in Fonne, sàbadu e domìnigu, ddoe est s’editzione 2024 de Identidades: s’isfilada ispantosa de màscheras de su connotu de Sardigna.
In fines, in Lungoni, chenàbura ddoe faghent sa “Chjiusunata Lungunesa” chi regordat sa traditzione agrìcula de su connotu cun una festa acapiada a sa messa de su trigu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta