Su Gazetinu, martis 6 de austu de su 2024
Règulas simpres pro si defensare dae is furas – Pagas dies a oe est essida sa nova de una betza de 94 annos de Casteddu pigada in trampa dae una giòvana chi at naradu chi fiat una carabinera: custa trampera at pedidu dinari e prendas de oro a cussa tzia, cun s’iscusa chi serbiant pro nde fàghere essire dae presone a su nebode chi dd’aiant arrestadu. S’istima pro unu parente in dificultade at bintu sa lughidesa de conca e cussa pitzoca furunca e trampera si-nch’est fuida cun unu valore de prus de 300.000 èuros, in antis de dd’arrestare is Carabineris comente aiat isbarcadu in su portu de Nàpoli.
Àtera liaga mala est cussa de is furas in apartamentu, chi ponet pistighìngiu a su 43% de is antzianos. Ddu faghet a ischire Confartesania Sardigna, chi in is dies passadas at publicadu unu vademecum piticheddu in contu de comente totu si defensare dae is trampas e dae is furas.
S’istadiale, difatis, est s’istajone peus pro custa genia de trampas: tramperis e furuncos nde aprofitant e bìsitant a is betzos chi, bortas meda, bivent solos in tzitades e biddas chi si sbòidant pro is fèrias.
“Sa prima règula est sa de tzerriare luegos a is Fortzas de s’Òrdine e de non si fidare de nemos”, narat Giovanni Mellino, presidente regionale de ANAP Confartesania Sardigna e vitze-presidente natzionale.
“Regordamus chi, ancoras oe in die, sa majoria de is furuncos intrat a domo pro more de ghennas o ventanas pagu seguras o dae calicuna ventana lassada aberta”.
Intra de is consìgios utilosos ddoe est semper su de non si fidare de chie non connoschimus e chi mustrat una tèssera de entes pùblicos comente a sa Posta, su Comune e àteros, mancari portet una divisa. Tocat semper a domandare su nòmene e su sambenadu e a si fàghere mustrare sa tèssera de reconnoschimentu. Si naschet carchi duda, cumbenit a tzerriare a is Fortzas de Politzia pro averiguare si cussa persone non siat calicunu tramperi cun ideas malas.
Si in domo tenimus un’abertura telecumandada e calicunu sonat, est mègius a no abèrrere, si non connoschimus chie est chi bolet intrare. In antis de abèrrere sa ghenna, est mègius a iscocare dae s’ispiontzinu o a s’incarare dae sa ventana.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta