S’Ìsula tremet pro sa limba biaita – In Sardigna torrat sa timoria manna pro sa limba biaita chi, intra de is àteros, ponet pistighìngiu a is duos assòtzios de categoria, Coldiretti e Confagricultura Sardigna. Comente agiomai dònnia istadiale, sa callentura catarrale de is berbeghes s’isparghet intra de is siendas sardas, cun is sierotipos diferentes chi ònnia istajone essint a campu in is cussòrgias regionales.
Segundu is datos de Confagricultura Sardigna de su 2 de austu, sunt 15 is logos de impestu essidos a campu intra de Gaddura, cun su sierotipu 8, e Sulcis, cun su sierotipu 3. Sa timoria est chi in is chidas imbenientes s’epidemia s’ispargat dae una sienda a s’àtera siat pro ite is vatzinatziones sunt cumentzadas prus pagu de duos meses a como, siat pro more de is temperaduras artas meda.
In Gaddura ddoe at atentu mannu pro is logos de impestu chi minetzant siat su setore de sa pesamenta de is berbeghes, siat cussu de sa pesamenta de is bacas. Si timet fintzas sa firmada possìbile de su tramudu de is animales pro unas 60 dies. Si acontesset custu, diat èssere “unu dannu mannu pro su setore bovinu in una simana de importu pro is bèndidas giai proadu pro more de sa sicànnia manna, comente in àteras cussòrgias sardas”, at decraradu Coldiretti Nord Sardigna.
In Sulcis puru sa situatzione no est bella meda: limba biaita, pegus mortos e pèrdidas econòmicas amegant de si connòschere giai in unos deghe logos de impestu essidos a campu pro como cun pistighìngiu mannu de is pastores, chi abetant s’istajone de su late e de is angiones. Comente at naradu Coldiretti Casteddu, serbint interventos urgentes cun antiparassitàrios.
Sa sanidade animale regionale est in allerta dae primìtzios de su mese de austu. Cunforma a su 2023, sa maladia est essida a pìgiu unu mese in antis e, a oe, is vatzinos pro is bacas, animales portadores de sa maladia, sa Regione non ddos at ancoras postos a disponimentu. E pròpiu su tramudu de is bacas dae is cussòrgias in ue ddoe est sa maladia est cunditzionada a manera grae dae su controllu PCR.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta