Su Gazetinu, giòbia 22 de austu de su 2024
Is apuntamentos in Sardigna in custa coa de chida – Faghimus unu fùrriu peri is apuntamentos de custa coa de chida in s’Ìsula nostra. In provìntzia de Aristanis, in Santa Justa, ddoe faghent s’editzione 2024 de sa Regata de is fassonis. Si cumentzat sàbadu cun s’addòbiu culturale “Othos”, in su tzentru “Logu Abertu”, mentras sa die in fatu sa manifestatzione s’abbiatzat cun s’isfilada de is fassoneris, de is cambaradas in màschera e cun sa regata a trivas. In Mòguru, imbetzes, sàbadu a merie acabbat sa de 7 editziones de “Pedras e Sonus Jazz Fèstival”, s’apuntamentu musicale itinerante prus de importu chi faghent in Marmidda e in Parte Montis, mentras in Ardaule ddoe cuncordant un’addòbiu enogastronòmicu pro avalorare is culurzones e su ‘ortau, produsimentos sintzillos de sa bidda de Barigadu, cun sa sagra, tastaduras e mùsica, chenàbura e sàbadu.
In provìntzia de Aristanis nche tenimus fintzas “Ìsulas de àteros mares”, tres dies de mùsica cun Dromos, dae chenàbura a domìnigu in Tadasune. In Aristanis, imbetzes, fintzas a sàbadu s’at a pòdere sighire sa de tres editziones de “Isparghiduras Fèstival” in s’Hospitalis Sancti Antoni, cun addòbios fintzas in Mandriola e in Arborea. In fines, in Santu Sarbadore, in su Sinis de Crabas, cumentzat sa festa religiosa e tzivile, sende acostende sa die de sa Currera de is iscurtzos.
In provìntzia de Casteddu e in su Sud de Sardigna ddoe est, imbetzes, sa festa de Santa Lughia de Muristeni, fintzas a lunis, e sa sagra de Sant’Arramundu, in Pula, fintzas a domìnigu. Sàbadu a merie, imbetzes, in Sant’Antiogu ddoe faghent sa de tres editziones de su “Fèstival de su Binu Carinnianu”, dedicada a custa genia de binu, cun tastaduras, enogastronomia e àteros istentos.
In Baunei, sàbadu, ddoe faghent torra sa Sagra de sa craba, apuntamentu ogiastrinu pro is amantiosos de enogastronomia e de cultura. Tramudende a Ulìana, ddoe agatamus sa festa tzivile e religiosa in onore de Santu Lussurzu fintzas a sàbadu, mentras in Orgòsolo sàbadu acabbat su Mesaustu orgolesu 2024.
In fines, domìnigu a merie, acabbat sa de 24 editziones de “Mùsica me in is Bucas”, su fèstival imbentadu e ghiadu dae Enzo Favata, cun unu muntone de mùsica intra de Casteddu Sardu e S’Alighera.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta