Sa passione pro su geladu in Sardigna – Is Sardos ispendent sa bellesa de 43 milliones de èuros pro conos, copigheddas, ghiatzolos e sorbetos. Ddu narat sa relata noa de Confartesania Sardigna intitulada “Geladerias: is impresas artesanas e is ispesas de is famìllias pro su geladu”, cuncordada cun s’impreu de is datos de s’Istat de ocannu passadu.
Segundu su dossier, fintzas a ocannu passadu is laboratòrios de geladeria in Sardigna fiant 98, in ue ddoe traballaiant 400 persones: sa regione nostra s’est classificada in su de 15 postos de sa lista natzionale pro nùmeros assolutos. Sa classìfica dda ghiat sa Lombardia, cun 1007 siendas.
Pro su chi pertocat sa gulosia de is Sardos, contende s’ispesa pro comporare gelados, s’ìsula est lòmpida in su de 12 postos: inoghe puru sa classìfica dda ghiat sa Lombardia, cun un’ispesa de 315 milliones a s’annu, sighida dae su Làtziu cun 167 milliones de èuros ispèndidos in su 2023 e dae su Vènetu cun 147 milliones.
Segundu sa relata, su 43,8% de is Sardos at seberadu is geladerias artesanales e is impresas piticas e mesanas. “Su nùmeru artu de geladerias artesanas e sa domanda semper prus manna de produsimentos artesanales fintzas foras dae s’istajone de s’istadiale – narat Giacomo Meloni, presidente de Confartesania Impresas Sardigna – cunfirmat chi is Sardos no renùntziant a sa calidade e sintzillesa de su produsimentu, fatu cun ingredientes e matèrias primas friscas, sena de cunservantes e de àteras atzuntas artifitziales, e traballadas cun is maneras de su connotu, sena de ddoe sulare àera”.
Intra de is gelados chi is Sardos agradessent de prus ddoe sunt cussos cun fràgula, tziculate, nughedda, limone, crema, pistatzu e istratzatella. Ma in Sardigna praghent meda fintzas is gelados cun sabores locales comente a cussos a sabore de seada, de murta e de pàrdula, o fintzas is gelados cun sabore de casu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta