Su Gazetinu, chenàbura 23 de austu de su 2024
Is istràngios in vacàntzia in Sardigna – Is biagiadores istràngios sunt de importu mannu pro fàghere crèschere su turismu sardu. In sa cassaforte de su sistema sardu de s’acasàgiu e de s’ispàssiu, gràtzias a issos, in su 2023 sunt intrados unu milliardu e 667 milliones de èuros, 432 milliones de èuros in prus cunforma a su 2022. S’ispesa de is istràngios chi ant bisitadu sa Sardigna est crèschida de su 3,2% cunforma a su 2022.
Custos nùmeros nde essint a campu dae sa relata de s’Ufìtziu pro is istùdios de Confartesania impresas Sardigna, intituladu “Cara a s’istadiale 2024”, chi at torradu a elaborare is datos de s’Istat chi pertocant s’istajone turìstica de ocannu passadu.
“Cun custos datos podimus nàrrere chi ocannu passadu est istadu su mègius annu pro su chi pertocat s’arribu de is istràngios e semus seguros chi in custu 2024 amus a lòmpere a su record de s’ispesa”, narat Giacomo Meloni, presidente de Confartesania Impresas Sardigna.
Su 48% de is presèntzias turìsticas in Sardigna est formadu dae is istràngios, faghende a manera chi s’Ìsula nostra siat in su de 9 postos de sa classìfica natzionale, ghiada dae sa Provìntzia autònoma de Boltzanu cun su 70,5%, sighida dae su Vènetu cun su 69,3% e dae su Làtziu cun su 63,7%, mentras sa mèdia natzionale est de su 52,4%. Ocannu passadu is istràngios ant ispèndidu 810 milliones pro s’acasàgiu, 353 pro sa ristoratzione, 200 pro is còmporas, 152 pro su trasportu de is passigeris e 150 pro àteros servìtzios.
Is previsiones pro su 2024 sunt chi custos nùmeros sigant a crèschere. “Su turismu nostru”, atzunghet su presidente Meloni, “mustrat torra sa resilièntzia sua e sa capatzidade de èssere unu setore de importu pro una parte manna de s’economia, ma bisòngiat a ddu sighire a agiudare, oferende servìtzios a tenore de sa domanda de su mercadu”.
Bisòngiat a punnare a fàghere crèschere is presèntzias in is meses de istajone bassa: a is turistas istràngios non ddis agradat su mare isceti, ma fintzas sa cultura, s’enogastronomia e sa connoschèntzia de is logos nostros, comente at sutaliniadu Daniele Serra, segretàriu de Confartesania Sardigna.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta