Su Gazetinu, giòbia 5 de cabudanni de su 2024
Is addòbios de custa coa de chida in Sardigna – Custos sunt is addòbios prus de importu in custa coa de chida in Sardigna. Ocannu puru torrant a fàghere “Atòngiu in Barbàgia”, chi lompet a sa de bintibator editziones. Cumentzat in Bitzi sa prima coa de chida de cabudanni: sàbadu e domìnigu is bias de su bighinadu antigu a subra de su Cursu Vitòriu Vènetu s’ant a abbiatzare de bisitadores chi bolent iscobèrrere is cortes e is domos betzas de sa bidda. Sa parte prus de importu at a èssere domìnigu a mangianu, cando ant a torrare a fàghere sa coja antiga bitzichesa (S’isposu bitzichesu). Sa rassigna, cuncordada dae sa Càmera de Cummèrtziu de Nùgoro e dae sa Sienda ispetziale ASPEN cun su contributu de sa Regione Sardigna e de su Bancu de Sardigna, at a interessare 32 biddas e at a acabbare su 15 de nadale in Orune.
Dae chenàbura e fintzas a su 10 de cabudanni, is biddas de Orosei, Nùgoro e Lodine s’ant a furriare a palcoscènicos istraordinàrios pro acasagiare su “Dantzas – Fèstival de baddos de su connotu”. Un’apuntamentu chi, lòmpidu ocannu a sa de noe editziones, totu is amantiosos de is traditziones de sos baddos e de su càntidu de sa Sardigna non podent pèrdere.
In provìntzia de Aristanis, in Marrùbiu, ddoe faghent sa de duas editziones de sa “Sagra de su cruguxoni de arrescotu”. Sàbadu a merie sa chena est in bia de Piave, in dae in antis de pratza de Amsicora, e a pustis, “Las Chicas Malas”, un’ispetàculu contivigiadu dae sa Leva 1999 de su Comitadu pro sa festa in onore de Nostra Sennora de su Remèdiu. In Aressa, imbetzes, ddoe est sa Sagra de sa mèndula: sàbadu e domìnigu ddoe faghent addòbios, mustras de coghina, tastaduras gràtzias a sa Pro Loco e unu muntone mannu de àteras cosas, comente a su motoaddòbiu contivigiadu dae su moto club aressesu e àteros ispetàculos musicales.
Tramudende a Baunei, in ue sighit sa festa pro Santu Lussurzu, in “Su pirastu colcau” sàbadu ddoe faghent su cuntzertu is Modena City Ramblers, mentras in Tuiri s’apuntamentu est in su bighinadu antigu de sa bidda cun sa de ùndighi editziones de “Septemberintuili”.
In fines, in Ceràxius, dae oe incarrerat su programma ricu de addòbios de sa Coja Antiga, a incuru de s’assòtziu turìsticu Pro Loco de Ceraxius, in ue domìnigu a mangianu ddoe afestant sa coja fata in lìngua sarda.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta