Su Gazetinu, chenàbura 6 de cabudanni de su 2024
Sa Sardigna regordat su mortòrgiu de Buggerru – Nche sunt passados 120 annos dae su 4 de cabudanni de su 1904, cando in Buggerru fiant mortos, ochidos dae s’esèrtzitu, bator minadores chi fiant in isciòperu. Felice Littera e Salvatore Montixi fiant mortos luegos, Giustino Pittau e Giovanni Pilloni, ingortos malamente, fiant mortos una pariga de dies a pustis. Su de regordare a custos traballadores e su sacrifìtziu issoro est unu dovere e, mancari oe cosas meda siant mudadas, sighimus a connòschere formas de isfrutamentu e mortes biancas, comente ant naradu martis in Buggerru in s’addòbiu “Su mortòrgiu de Buggerru de su 4 de cabudanni de su 1904 – S’importu de s’acontèssidu in sa carrera istòrica, sotziale e giurìdica”.
In su cunvegnu, cuncordadu a intro de is tzelebratziones de su de 120 anniversàrios de su mortòrgiu de is traballadores de sa miniera Malfidano, su giornalista Antony Muroni at faeddadu de chistiones pagu connotas de custu mortòrgiu, dae ue nde fiat nàschidu su primu isciòperu generale natzionale de s’istòria de Itàlia. S’iscritora Iride Peis Concas at faeddadu de su rolu de is fèminas in sa vida de is minieras e me in is chèscias sindacales. Gianni Loy, chi est istadu professore de Diritu de su traballu in s’Universidade de Casteddu, at faeddadu imbetzes de is cunditziones de vida de is pipios a primìtzios de su Noighentos, mentras Riccardo Massole, fìgiu de su poeta Manlio, at lèghidu duas poesias chi su babbu aiat iscritu e dedicadu a su mortòrgiu. In fines, s’atore Luigi Pusceddu at acabbadu cun unu monòlogu in ue at regordadu cussas dies turmentosas de chèscia de su 1904.
Sa die in fatu ant cuncordadu is tzelebratziones pro onorare sa memòria de chie at gherradu pro su diritu a unu traballu e a una vida de giudu: a mangianu, in pratza de su Mortòrgiu, ddoe ant fatu sa Missa Santa de regordu, ponende fintzas una corona de frores in dae in antis de sa targa chi ddoe aiant postu, cun is parlatas de is autoridades e de is rapresentàntzias sindacales. A pustis de is saludos de sa sìndiga Laura Cappelli, sunt intervènnidos su presidente de su Consìgiu regionale Piero Comandini, sa presidente de sa Regione Alessandra Todde, su segretàriu cunfederale natzionale de sa Cisl Ignazio Ganga, su segretàriu organizadore natzionale de sa Uil Emanuele Ronzoni e sa segretària cunfederale de sa Cgil Daniela Barbaresi.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta