Su Gazetinu, martis 30 de trìulas de su 2024
Consìgios utilosos pro s’impreu de is cunditzionadores – Sunt dies de basca manna in totu s’Ìsula, cun temperaduras artas siat a de die siat a de note e cun gente meda chi chircat de illebiare s’istorbu alluende su cunditzionadore.
Mancari siat unu de is eletrodomèsticos prus apretziados e utilosos in is dies de istadiale, tocat de connòschere unos cantos segretos, pro ddu pòdere impreare in sa mègius manera.
Pro cussu s’Agentzia natzionale pro is tecnologias noas, s’energia e s’isvilupu econòmicu sustenìbile (ENEA) e Confartesania Sardigna ant istudiadu 14 consìgios pretziados pro s’impreu de su cunditzionadore.
Si cumentzat dae sa manutentzione regulare, chi permitit de no isfortzare su machinàriu e de isparanniare fintzas a su 30% de energia. In prus, est mègius a apoderare lìmpios sa vèntola e su filtru, in ue si diant pòdere formare mucore e batèrios.
Cando ddu comporamus (ddoe est fintzas un’agiudu econòmicu) est mègius a donare atentu a sa classe energètica de su machinàriu, a sa presèntzia de sa tecnologia inverter, chi règulat sa velotzidade de su compressore de sighidu.
Est de importu a apoderare sa temperadura intra de 24 e 26 grados, ponende in onni aposentu unu cunditzionadore in sa parte arta de su muru. Diat tocare de serrare is persianas a ora de sole e, cando su cunditzionadore est allutu, tocat a serrare ghennas e ventanas.
Is tubos de su tzircùitu infriscadore depent èssere coibentados cando current foras dae domo, in prus est mègius a pònnere termòstatos programmàbiles e a ismenguare s’impreu de aparechiaduras in is oras prus bascosas. Un’àteru consìgiu utilosu est su de collegare sa pompa de calore a su fotovoltàicu, pro leare sa currente elètrica. In fines, diat èssere cosa bona a fàghere controllare bene s’isulamentu tèrmicu beru de sa domo, pro ismenguare s’isperdimentu de su callente (in s’ierru) e de sa friscura (in s’istadiale).
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta