Su Gazetinu, mèrcuris 11 de cabudanni de su 2024
Is pèrdidas de abba in Sardigna – Sa Sardigna est in su de bator postos de una classìfica natzionale chi ponet pistighìngiu: sa de is isperdìtzios de abba cuncordada dae sa CGIA.
Ddu faghet a ischire sa Confartesania Impresas Sardigna, chi at fatu un’analizu de s’impreu de abba dae parte de is siendas de s’Ìsula. Segundu is datos de s’ISTAT, sunt 2.164 is siendas – e de custas 1.534 sunt is siendas artesanas – chi traballant me in is 10 setores de sa manifatura chi ispatzant agiomai su 32% de is resursas ìdricas de s’Ìsula.
Si contat chi in Sardigna ònnia die in is retzas ddoe currant 424 litros de abba peròmine e chi si-nde perdant 224, est a nàrrere su 52,8%, contras de una mèdia natzionale de su 51,9%.
Intra de is tzitades cabulogu de provìntzia in ue is pèrdidas sunt prus mannas ddoe est Tàtari cun su 63,4% de s’abba isperditziada e su de 11 postos in sa classìfica de is 109 tzitades cabulogu italianas. Sighit Aristanis – chi est sa de 14 in Itàlia – cun su 60,4% de pèrdidas e Nùgoro cun su 55,1% e su de 19 postos in sa classìfica. In fines Casteddu cun su 53,5% e su de 25 postos. Sa tzitade prus virtudosa in Sardigna, imbetzes, est Carbònia, pro ite ca perdet isceti su 21,7% de s’abba.
S’Itàlia a dolu mannu non si sèberat pro is investimentos in su contivìgiu de is infrastruturas, cun is retzas ìdricas comunales chi sunt unu colabrou in totu is regiones italianas: intra de is crititzidades prus mannas ddoe sunt is tubos papados dae su ruìngiu, is guastos in is condutas e in is impiantos, is dificultades amministrativas ligadas a is leturas de is contadores e is impreos de abba pro fainas no autorizadas.
De oto milliardos de metros cubos de abba chi current in is retzes comunales de isparghidura de s’abba bella a bufare, si-nde perdent 3,4 milliardos, est a nàrrere su 42,4%. In su Sud de Itàlia e me in is Ìsulas s’arribat a una mèdia de su 50,5%.
Castiende a is regiones, is pèrdidas sunt prus mannas in Basilicata cun su 65,5%, in Abrutzu cun su 62,5%, in Molise cun su 53,9%, in Sardigna cun su 52,8%, sighidas dae sa Sitzìlia cun su 51,6%, dae sa Campània cun su 49,9%, dae s’Ùmbria cun su 49,7%, dae sa Calàbria cun su 48,7% e dae su Làtziu cun su 46,2%.
Sa regione prus virtudosa est s’Emìlia Romagna, cun a penas su 29,7% de abba chi si-nche isperdet.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
