Più informazioni
Su Gazetinu, chenàbura 28 de làmpadas de su 2024
Is presones sardos sunt tropu prenos – Is presones de Sardigna sunt tropu prenos, mentras is colònias penales sunt mesu bòidas. Ma non bastat: is fràigos sunt betzos, iscarrabetzados e non sunt adatos a torrare a educare a su presoneri.
Is istruturas penitentziàrias in Sardigna si presentant aici, in custu cuadru pintadu dae Irene Testa, sa garante regionale pro is persones sutapostas a provedimentos chi impèigant sa libertade personale, chi dd’at presentadu in una cunferèntzia cun is òrganos de informu fata su 19 de làmpadas.
A s’addòbiu ddoe ant pigadu parte fintzas su vitze-presidente de su Consìgiu regionale Giuseppe Frau, sa presidente de sa de Ses cummissiones de su Consìgiu regionale Carla Fundoni e is garantes comunales de Casteddu Gianni Loy, de S’Alighera Carmelo Piras, de Tàtari Gianfranco Favini, de Nùgoro Giovanna Serra e de Aristanis Paolo Mocci.
Is nùmeros prus artos in contu de s’intipidura pertocant Casteddu e Uda, cun su 107%, sighidas dae Tàtari e Tèmpiu cun su 104%, Màssama 86% e, in fines, Nùgoro cun su 50%. Bisòngiat de cunsiderare chi su tassu de intipidura de is presones a livellu natzionale est de su 119,3%.
Pistighìngiu mannu ponent is datos chi pertocant is mortes a manu pròpia etotu in presone: in Itàlia in su 2022 sunt istadas 84, in su 2023 su nùmeru nd’est caladu a 68, in is primos meses de su 2024 sunt giai 44. In Sardigna in su 2023 sunt acontèssidos 3 suitzìdios, 2 in Uda, 1 in Tàtari.
Ma su chi ponet prus pistighìngiu in s’Ìsula est su nùmeru artu de tentativos de suitzìdiu e is fainas de autolesionismu e is presoneris chi sufrint de carchi maladia e chi depent istare in tzellas pagu sanas, no adatas a chie tenet problemas de salude.
In fines, semper sa garante Irene Testa at ispartu una relata in contu de is fainas fatas in su 2023, sutaliniende sa dificultade chi ant tentu is ufìtzios in su pònnere paris is datos natzionales e sutaliniende sa mancàntzia de su totu de trasparèntzia, mancari su Consìgiu de Europa apat giai contraventzionadu s’Itàlia pro custu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
