Più informazioni
Su Gazetinu, lunis 1 de trìulas de su 2024
Is atendentes in Sardigna de familiares malàidos s’addòbiant – Lunis passadu in sa sala de is cunferèntzias de s’Hotel Mistral 2 ddoe ant fatu su cunvegnu intituladu “Atendentes de familiares malàidos: chie si-nde incurat de issos?” cuncordadu dae s’assòtziu Tzitadinàntziativa Sardigna, a manos de pare cun sa Asl de Aristanis.
Sa prima parte de su cunvegnu dd’at ghiada Francesco Mastinu, mèigu e consulente iscientìficu de Tzitadinàntziativa, cun s’introduida de sa coordinadora de Tzitadinàntziativa Aristanis, Maria Grazia Fichicelli, e de su segretàriu regionale de s’assòtziu, Giorgio Vidili. A merie imbetzes si sunt ascurtadas is testimonias de is atendentes familiares e, a pustis, ant cuncordadu una mesa tunda.
Est istadu un’addòbiu de importu mannu in ue nde sunt essidos a campu datos interessantes: in Sardigna is atendentes de familiares malàidos chi si-nde incurant de unu parente no autosufitziente sunt prus de 185.000, su prus sunt fèminas.
E mancari nche siat una lege regionale, aprovada in su 2023, chi previdet s’amparu de is atendentes de familiares malàidos, comente at naradu Francesco Mastinu “cussa lege, sa nùmeru 12 de su 6 de onniasantu de su 2023, portat cambas curtzas. Bisòngiat a dda finantziare e a ddi donare aplicu. Sa prima cosa de fàghere est a fàghere nàschere unu registru regionale de is atendentes de familiares malàidos”.
“Su benidore de custa lege regionale dipendet dae s’impignu polìticu chi, in teoria, ddoe diat dèpere èssere”, sighit Mastinu; “su chi domandamus est unu reconnoschimentu formale e un’agiudu in su traballu, pro ite ca bortas meda custos atendentes de familiares malàidos depent abbandonare su traballu issoro pro si dedicare de su totu a su parente chi agiudant”.
Pro immoe sighit su caminu cara a una lege natzionale: “S’ispera”, at atzuntu Mastinu, “est chi dd’aprovent dae inoghe a un’annu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
