Più informazioni
Su Gazetinu, giòbia 26 de cabudanni de su 2024
Is addòbios de custa coa de chida in Sardigna – In custa ùrtima coa de chida de cabudanni, in Sardigna, sunt medas is addòbios de cultura, de ispetàculu e is festas.
In provìntzia de Aristanis, a prus de is ùrtimos apuntamentos de su Cabudanni Aristanesu chi ant a abbiatzare su cabu-logu, de importu est su Sardigna Endurance Festival 2024 in s’Horse Country Resort de Arborea, cumentzadu oe e in programma fintzas a domìnigu. In Nurachi, imbetzes, ddoe faghent su “DiVini Sapori e àteros contos”, sa chena in sa corte de su Museu “Pepetu Pau”: unu bàntidu de is istànios e de su binu de cussos logos, cun su menù ricu de s’espertu coghineri Alberto Sanna. In fines, in Samugheo est s’ùrtima coa de chida pro pòdere bisitare sa de 57 editziones de “Tessìngiu”, in antis de serrare.
Sighit sa manifestatzione de “Atòngiu in Barbàgia”, cun is apuntamentos prevìdidos in Orane e Durgali. Fiat in programma fintzas Lollove, ma s’apuntamentu dd’ant annuddadu pro more de sa disgràtzia manna chi at interessadu sa tzitade de Nùgoro eris.
Semper in custa coa de chida, àteras 17 crèsias romànicas aberint is ghennas issoro a is bisitadores in totu sa Sardigna, a intro de sa manifestatzione “Itàlia Romànica” cuncordada dae sa Fundatzione “Sardigna Ìsula de su Romànicu”, cun s’agiudu de sa retza de is entes locales. In custos 17 logos diferentes, is oràrios de abertura de is crèsias sunt custos: dae is deghe de mangianu a sa una e dae is tres de merie a is ses.
In Ìtiri, custu sàbadu, s’at a torrare a segus in su tempus gràtzias a “Manos de fainas pro s’afidu”, is costumàntzias de sa coja in is annos Chimbanta de su sèculu passadu; cras, imbetzes, e fintzas a domìnigu in Sant’Antoni di Gaddhura afestant a su patronu.
Non bolent pèrdidas, sàbadu e domìnigu, is “Dies Europeas de su Patrimòniu” in Biddanoa de Forru e, sàbadu isceti, in Atzara: ocannu su tema est “Patrimòniu in caminu”, un’invitu a meledare in contu de su valore de su patrimòniu culturale chi est s’ispigru de s’identidade culturale in caminu.
In contu de sagras, imbetzes, in Sant’Andria ‘e Frius ddoe cuncordant ocannu puru sa Sagra de sa Mèndula, chi impromitet un’esperièntzia cun is sabores antigos e cun is traditziones de Sardigna. Dd’aparitzat sa Pro Loco in is dies de sàbadu e de domìnigu, cun unu muntone de fainas pro mannos e piticos.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
