Più informazioni
Su Gazetinu, lunis 16 de cabudanni de su 2024
Assuntziones de Forestas in ritardu – Cando ant a pòdere comintzare a traballare is dipendentes noos de s’Agentzia regionale Forestas? In medas amegant de si ddu pregontare, pro ite ca non sunt pagos is giòvanos sardos abetende custu traballu in sa carrera de s’avaloramentu e de s’amparu de is padentes de Sardigna. E immoe ddu pregontant fintzas is consigieris Franco Mula e Stefano Schirru, de su grupu “Alleàntzia Sardigna” in Consìgiu regionale, chi proponent in contu de custu un’interrogatzione a sa presidente de sa Regione Alessandra Todde. Prus a fine, is consigieris regionales de minoria faeddant fintzas de is cosas chi impèigant s’acabbu de is protzeduras de assuntzione e apretant de pònnere is resursas econòmicas chi diant permìtere is assuntziones noas.
Mula e Schirru regordant chi sa Regione est in prima lìnia in Sardigna in s’amparu de su patrimòniu naturalìsticu, ma pro more de sa crèschida de s’edade mesana de su personale in servìtziu e pro more de s’andada in pensione de is dipendentes chi nde tenent su diritu, sa tarea de assegurare s’amparu de is padentes e sa preventzione dae su fogu de s’istadiale est semper prus dificultosu a dda fàghere.
Sa Regione aiat postu 46 milliones de èuros cun sa punna de afortire s’òrgànicu de Forestas. Cun custas resursas, in is tres annos 2022-2024, si diant èssere pòdidas fàghere 1.300 assuntziones, permitende siat sa gherra contras de su fogu, siat unu tempus benidore prus seguru pro medas giòvanos in Sardigna.
Alleàntzia Sardigna cun is consigieris regionales suos domandat a sa presidente de sa Giunta regionale Alessandra Todde de pònnere in craru si e cando is protzeduras ant a pòdere andare a in antis e si is cantieris e is progetos siant a berus prontos pro permìtere a su personale nou de pòdere cumentzare su traballu pro amparare su patrimòniu naturalìsticu sardu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
