Più informazioni
Su Gazetinu, martis 25 de làmpadas de su 2024
Prus seguresa in is prajas cun s’Areus – In Sardigna ant incarreradu su pranu de istadiale pensadu dae s’Areus, sa sienda regionale pro s’emergèntzia e urgèntzia, istudiadu pro frunire unu sucursu sanitàriu in antis de lòmpere a s’ispidale dae parte de su 118. Su servìtziu est a disponimentu dae su 15 a su 30 de làmpadas e bolet parare fronte a is bisòngios de sa presèntzia turìstica manna chi si biet in s’istadiale in is logos balneares prus de importu.
Su pranu previdet s’illonghiamentu de is oràrios de disponibilidade de unas cantas postas de base gestidas dae is assòtzios e dae is cooperativas cunventzionadas a totu annu e s’incarreru de postas noas de base e avantzadas in ue serbint.
Gràtzias a sa disponibilidade de is infermieris Areus, sa Sienda ocannu puru tenet a disponimentu is mezos de sucursu infermierìsticos pro sa gestione comente si tocat de is patologias chi ‘dipendent dae su tempus’, is chi tenent bisòngiu de atentu mannu a lestru dae parte de personale sanitàriu formadu e cun unu livellu de ispetzializatzione arta.
“In is logos prus a tesu dae is tzitades o dae is biddas prus mannas, su pranu Areus punnat a afortiare su sucursu chi frunint giai is assòtzios e is cooperativas sotziales cun is ambulàntzias de base”, narant is de s’Areus. “Sa punna est sa de ammanniare sa retza de is mezos de sucursu e de arribare cantu prus a lestru a su logu de su bisòngiu”.
Su pranu de afortiamentu, in fines, previdit s’impreu – a prus de is mezos de sucursu de sa retza avantzada e de base – fintzas de s’elisucursu chi est collegadu a duas Tzentrales operadoras 118 de Casteddu e de Tàtari, cun is elicòteros presentes in is tres bases de Terranoa (aberta a su note puru), de S’Alighera e de Casteddu (abertas a de die).
Is oràrios e is dies de servìtziu in is prajas si podent lèghere in sa delìbera 233 de su diretore generale de s’Areus.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
