In evidenza:
Su Gazetinu, giòbia 12 de cabudanni de su 2024
Is apuntamentos in custa coa de chida in Sardigna – In custa coa de chida puru sa Sardigna oferit unu muntone mannu de apuntamentos e addòbios: sàbadu in Durgali ddoe cuncordant su Cannonau Experience. S’aparitzu ddu contivìgiat s’Assòtziu “Authentic Sardinia”, chi at pensadu a unu giru enogastronòmicu pro connòschere mègius is calidades diferentes de binu sardu, intra de tastaduras de binos bonos e addòbios culturales.
Sa biddighedda bella de Biddanoa de Forru, sàbadu e domìnigu, acasàgiat sa de 17 editziones de “Artes, sabidorias e sabores” antigos. Cuncordadu dae su Comune a manos de pare cun sa Pro Loco e cun su Parcu de Genna Maria, s’addòbiu bolet fàghere a connòschere is traditziones antigas de Marmidda.
In Tèmpiu, dae chenàbura a domìnigu, ddoe faghent sa de sete editziones de su Bookolica Festival. Su tema de ocannu est sa relata intra de identidade e diversidades, pigada in cunsideru gràtzias a una filera de fainas chi movent dae s’arte de istrada a su giornalismu de inchiesta, dae sa mùsica a su teatru. Ddu cuncordat s’assòtziu “Bottega NoMade”, cun sa diretzione artìstica de Fulvio Accogli.
Istòria e mùsica fintzas a sàbadu, cun su “Santa Barbara International Music Festival” in Buggerru e in àteros logos de su Caminu Mineràriu de Santa Bàrbara. Custa editzione, cumentzada su 10 de cabudanni e in programma fintzas a sàbadu, previdet cuntzertos in logu abertu e itineràrios in logos ricos de istòria, archeologia e panoramas ispantosos.
In Aristanis, sighint is apuntamentos de su Cabudanni Aristanesu. Chenàbura a merie, in su Museu diotzesanu aberit “Regarder. Is aposentos de sa memòria”, mustra personale de La Fille Bertha, mentras sàbadu, in sa ruga de Santa Maria, ddoe faghent sa Festa de Santa Rughe e su Memorial Enrico Fiori. Pro is amantiosos de su rock, in arborada de Repùblica, ddoe at a àere mùsica meda in su palcu de sa Contea. Sàbadu e domìnigu apuntamentu cun s’addòbiu regionale de su Vespa Club e, domìnigu a mangianu, cun sa gara tziclìstica pro su de IV memorial “Beppe Meloni” – XV Copa de Santa Rughe.
In Crabas, imbetzes, sàbadu e domìnigu ddoe ant a fàghere su “Festival de sa Butàriga”, cun unu muntone mannu de addòbios, òspites, laboratòrios, esperièntzias e tastaduras, chi si-nd’at a pòdere bìere un’antitzipatzione chenàbura a merie in unu pre-fèstival in sa Cantina de is Còntinis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
